هاي الكلمة سمعتها جديد والي عرفته من المصدر انها انقالت على لعبة شدة الخسران كان معصب فقال وقتها: تراها موقفة معي على حرف الخا.
السؤال الي بيطرح نفسه هو: انت عارف اذا القايل كمل كلامه بعد حرف الخا شو كمالة الجملة؟؟؟، اذا انك فهلوي اكيد عرفت، أو يمكن تطلع مقلع وكلام الدواووين بتفهمه على الطاير.
على كل حال سواء بتعرف كمالتها أو ما بتعرف بحب أعطيك معلومات بسيطة عنها، هاي الجملة يا سيدي أو يا ستي أسلوب شوي محترم قبل ما تفقد أعصابك يعني بما معناه بتحكي بطريقة غير مباشرة للي قدامك والي واصلة بينك وبينه وبدها شعره وتولع مشكلة "اذا زودتها كمان شوي رح أكمل بعد حرف الخا ورح أشيل الاحترام الي بيني وبينك فجلس وأعطي جلاكس".
جد هاي الكلمات والمصطلحات الجديدة بتساعدك كيف تطلع من المشاكل وبطريقة كمان خفيفة دم، والأحلى من هيك انك بتقدر تخترع أي كلمة الها معنى أو لأ وتحطها بالسياق الي بيعجبك وتصير تدحشها بكلامك.
مثلا عندي صاحبتي لما تسمع كلام مش عاجبها وبدها الي قدامها يسكت بتقول: "طحلب"، يمكن الناس الي ما بيعرفوها بيقولوا عنها مهبولة بس احنا اصحابها الي كتير كول;) صرنا نفهملها على الطاير، فقبل ما تعصب وتقلب الدنيا بتقول للي قدامها طحلب مع ابتسامة مفادها: أنا لهلأ لساتني رايقة كمان شوي بقلبها دندرة.
طحلب مصطلح انعرف شو سياقه بس فيه مصطلحات هاي معانيها مفتوحة بتحكيها وين ووقت وزي ما بدك، متل "فست" ما بعرف ازا سمعتوه أو لأ، يعني بتقدر تقول: الفست اجا ،، الفست راح؟؟ وهون معناه البنت الحلوة أو المزة على قولة اخوانا المصريين أو الخسة والكرزة على قولة اخوانا الزرقاويين أهل الدوواوين.
وكمان ممكن تحكي والله هاليومين مقطوع من الفست معكاش فست تدايني؟ هاي مبينة ما بدها شرح، أو شفتلك فست في السوق على أول الراتب رح اشتريه؟ هون الله أعلم شو هو الفست بس بيبين من سياق الكلام.
على كل حال انتهى الفست عندي، خليني اروح اشوف المدير لتوصل معه لبعد حرف الخا.
ليست هناك تعليقات:
إرسال تعليق